Son Martín Martínez, creador desta empresa que nace do apego ao territorio, da felicidade que me fai gozar dos demais e do pracer de coñecer á xente que nos visita. Entre outras actividades profesionais que desenvolvo, o meu compromiso co proxecto Sacra Activa baséase no compromiso de contribuír de primeira man ao crecemento e desenvolvemento da nosa Ribeira Sacra.

Meus pais seguiron a profesión dos seus avós, a de vivir no campo, unha agricultura multisectorial, actividade de subsistencia no rural galego.

De miña nai, sen dúbida, herdei esa forma de ser tan galega, baseada na hospitalidade, en agradar ao visitante, coa conseguinte satisfacción que produce no visitado.

De meu pai valoro sobre todo a constancia e o traballo, quizais non coñecín a ningunha persoa máis traballadora, agás a súa irmá Fina, sen dúbida procede da familia.

Cando medras entre vides e vacas nunha pequena aldea desta Ribeira Sacra, é habitual sentir aos veciños coma se fosen da túa propia familia. Desta terra lembro unha infancia que pasou despacio, que me permitiu sentir plenamente cada estación, festividade ou acontecemento, por pequena que fose; un ambiente seguro e saudable. Dende aquí fórxase un xeito de ser que te acompañará ao longo da túa vida e levamos dentro de nós moitas persoas desta parte de Galicia.

Despois de rematar os meus estudos en Monforte de Lemos, comecei a buscarme a  vida e fuxir do traballo duro e pouco rendible no campo. Unha das primeiras cousas que fixen foi vender a augardente que facía artesanalmente meu pai. Durante un tempo leveino a Asturias, e a modo de anécdota, lembro que ao falar cos hostaleiros non dubidaban da súa orixe caseira, foime moi difícil falar castelán, ao longo da miña vida e xa con 20 anos, só  falara galego.

Daquela alguén me ofreceu mercar esas máquinas expendedoras de pistachos a granel a prazos, calquera traballo ou pequeno comercio era máis divertido e rendible que traballar de labrego, curioso que agora me resulte tan satisfactorio, tamén terá que ver con que non se fai por necesidade. Pois ese foi o xerme de ter dedicado máis de 25 anos á explotación de varios tipos de máquinas que funcionan con moedas, principalmente recreativas, e telo feito á parte de Galicia, onde nunca deixei de traballar, en Andalucía e República Dominicana. .

En 2011 viaxei a Cuba por primeira vez, cativoume ao instante. Nun curso de turismo da Escola Galega de Turismo, aprendin que a viaxe comeza cando empezas a buscalo en internet. Pois ben, moitas familias con vivendas de aluguer que alugaban a turistas estranxeiros non tiñan medios nin forma de darse a coñecer na rede de redes. O destino levoume xunto a Kiki, o meu amigo da Ciénaga de Zapata, un lugar paradisíaco, para o que quería facer unha páxina web para que a xente coñecese este lugar e ao mesmo tempo axudase a el e á súa muller Daylena. Así nace www.hostalkiki.com e despois viñeron máis viaxes e outra web www.casahostalcuba.com Ei xa puxemos máis de 200 casas de varias provincias, información que nos levou varios meses recompilar, nun esforzo totalmente gratuíto. . Así que pasei máis dun ano en Cuba, a miña segunda patria, polo menos sentimentalmente.

Agora estou inmerso neste proxecto turístico coa miña compañeira Graciela González, temos a nosa filla Adriana, que xa cumpliu 4 anos. Graciela achega o seu traballo con personalidade e estilo propios a todos os detalles da nosa adega Ecosacra.

Nieves Castillo, orixinaria de Venezuela e formada como mestra infantil, é a persoa que me acompaña habitualmente nas Experiencias VIP, unha profesional de gran axuda e cuxo saber é facer destacaría.

E o último en incorporarse ao noso equipo é Florin Dulea, un inmigrante romanés dunha pequena aldea de agricultores á beira do Danubio, moi sensible co ecolóxico, que encaixa coa nosa recuperación de viñedos e hortas sostibles que estamos a emprender.